喺警隊有「辣椒仔」之稱嘅總警司林曼茜,在警隊擁有多個「第一」紀錄,包括首位警隊機動部隊〈PTU〉女教官、首位女性任港督榮譽副官,曾喺香港回歸交接時接待過英國皇儲查理斯,呢位喺男性主導嘅警隊打出一片天嘅警隊辣椒仔將於今日退休,結束31年警隊生涯。
於1999年同2001年先後擔任PTU大隊長同女教官嘅林曼茜已察覺時代不同,以暴易暴嘅文化唔再係警務工作重點,加上公眾集會日趨增加,前線人員面對不少衝突,於是佢發起引進EQ同發展衝突管理訓練,加強前線人員運用多元化視角同應變能力化解衝突。
佢同八方講,經常提醒下屬若遇到有人「挑機」,要冷靜處理,佢曾在遊行集會期間,被一名年青人用長鏡頭貼近塊面拍攝,「我心平氣和禮貌同佢講:『先生,你咁近影相會拍得唔清楚,不如你行遠啲去影啦。』對方聽完之後就行開咗,好多嘢唔需要硬碰硬,否則,只會造成更多衝突。」
不過,佢話大前提係市民亦需尊重法律同不可破壞秩序,「有部分年青人被煽動,不斷挑戰警方底線,我哋會盡量容忍,但絕對唔可以阻礙警方執法同違反法律破壞秩序。」佢亦唔認同警務人員人工「包埋」被人鬧,「遇到當街俾人鬧,我會叫伙記行開,如果對方追著嚟鬧,就同佢講冷靜,如果對方仲繼續邊行邊鬧,就要提出警告,對方仍然鬧唔停,先至拉佢,最重要係將衝突減至最低。」
佢又認為佔領運動成為市民不守法、挑戰警方嘅催化劑,影響警民關係。佢指事件反映社會忽略青少年訴求,引致佢哋不滿,「唱衰香港對大家都無好處,但我嗰女竟然話我不知民間疾苦,貧富懸殊,我自細家貧,做過工廠,又要喺英國半工讀大學,我點會唔知民間疾苦!」佢說時仍氣難下,指青少年是非判斷糢糊咗,認為社會應該多啲同青少年溝通及提供協助,俾佢哋歸屬感及自豪感。
佢又話雖然現行法例尚可應付警察被侮辱嘅問題,但如果情況惡化,當局就有需要研究辱警罪嘅立法問題,但佢承認現時政治環境下,難推行辱警罪。
以女性身份在警隊打破多個「第一」紀錄的林曼茜坦言,女性要喺男人做主導嘅警隊造出成績需比一般人付出多10倍努力,「歧視女性係必然,但只要努力就會感動他人。」佢以2002年出任首位女機動部隊教官為例,「我頂頭男上司第一年俾我考勤只係C級,我當然不服,但我無氣餒,更積極努力工作,第二年佢俾我B級,至第三年佢俾我A級。」佢話現今社會思想開明,男女平等,佢有信心將來會出現首位女警務處長。
至於退休大計,MadamLam話會以另一形式繼續為社會服務,「我會做義工,探訪長者等社會上有需要嘅人,仲會為長者免費剪髮。」