方力申練得一身肌肉上娛樂版，令人眼前一亮。唐牛近排喺港島東海濱長廊跑步，間唔中都會撞到呢位飛魚王子，由於佢着住風褸關係，完全睇唔出已經進化到肌肉mode，果然係禾稈冚珍珠。
正當大家嘅焦點，放咗喺佢用乜嘢嚟裝假狗sell底褲，相信冇乜人留意到，其實條紅底係近排走勢強到爆炸嘅安踏體育（2020）新產品。
點解咁勁抽？因為安踏剛公佈最新訂貨會及同店銷售表現，絕對係真材實料，其中今年第四季訂貨會訂貨金額，連續四個季度錄得正增長之餘，更出現低雙位數升幅，明顯較之前高單位數增幅更上一層樓，第一季同店銷售按年保持中單位數升幅。種種迹象均顯示，安踏已走出低潮。證券商瑞銀發表報告，對安踏第四季訂貨會表現感到滿意。

另外，該行指季度同店銷售增長，或未反映安踏童裝及Fila中國業務嘅強勁表現。基於以上因素，瑞銀維持安踏買入評級，目標價睇16蚊，較現價12.08元，有32%潛在升幅。
睇圖表，安踏一直穩守上升軌，完全免疫於chok上chok落嘅市況，強勢畢呈，噚日搶升7.5%，再次上闖早前嘅橫行區，兼突破50日線，技術走勢靚絕。
世界盃舉行在即，體育用品股有望借勢炒番轉，安踏要升穿今年高位約12.8元，絕非不可能任務，一旦破位，下一站可見15元。

唐牛