中秋佳節人月兩團圓，但係今年中秋未到，就有五位大男人經常聚埋一齊將佢哋份廿年情不斷放閃，呢五位大男人鄭伊健、陳小春、謝天華、林曉峰同錢嘉樂今晚就閃到嚟《娛果》直播節目《今日ENT》，接受訪問講吓今次㩦手演出電影《黃金兄弟》外，又玩遊戲互爆秘密，兼猜燈謎考智慧。

五位豪爽男人，埋位就先哼下佢哋合唱嘅電影主題曲《一起衝 一起闖》，然後各自介紹戲中角色嘅角色，身兼導演同演員嘅錢嘉樂（淡定）、鄭伊健（獅王）、陳小春（火山）、林曉峰（老鼠）同埋謝天華（Bill）。

究竟廿年兄弟情，自己喺兄弟眼中係點嘅呢？佢哋各人先抽出一條問題然後回答，第一條問題由導演錢嘉樂抽先，佢抽到問題係「邊個最貪玩？」錢嘉樂就話：「都係謝天華。」謝天華反應好大話：「又係我，攪錯。」一眾兄弟爆料指天華鍾意水上活動鍾意到買晒啲遊艇，甚至連陸上活動都玩得非常好，電單車乜嘢都好，一鍾意就弊，仲要去到（拍攝）現場又踢毽，天華解釋踢毽係中國國粹，去到外國拍戲就要介紹畀啲外國朋友。

輪到天華再抽出問題「邊個最唔飲得（酒）？」成班兄弟又笑住指向天華「又係佢」，錢嘉樂笑住話「出晒名㗎啦﹗獎門人話畀我聽。」林曉峰再加句「飲又唔飲得，酒品又唔好。」錢嘉樂再補充「佢唔飲得由自可，問佢噚晚你嘔呀？佢會話冇呀﹗」天華晦氣話「我認。」

到伊健抽出問題「邊個最好記性（記仇）？」天華即自認「又係我，咁玩我仲唔記你哋十年呀﹗」輪到小春賭神上身揭問題牌「邊個最鍾意搞爛GAG？」一班兄弟再一次指住天華話「又係佢。」林曉峰指今次部戲自己整親條頸，小春整親條腰，錢嘉樂就整親膝頭哥，跟住大家叫天華自己講整親邊度，天華就認真mode話「我最傷，連咗幾十針，拍嗰個動作好難，一嚟就喺地下一扯，啪一聲，死火啦，睇下件衫爆開咗，要縫三十幾針。」最後睇埋林曉峰條問題「邊個最為食？」又再次傳出叫囂聲「點解啲問題咁精準。」「啲問題係衝住佢而嚟。」

除咗天華之外，另外四位兄弟似乎玩上癮，錢嘉樂見到「邊個最鍾意蛇王？」佢又話要補充「我哋嗰時喺九龍城排舞，大家好認真，尤其我哋三個（伊健、林曉峰），小春都會遲啲啲，因為佢熟，唯獨最遲嗰個大蛇華，著拖鞋，嚟到仲未排，拎埋瑜伽啲墊，點知排排吓瞓覺，唔知以為佢同老婆講走咗出嚟，然後無地方去。」天華無奈地話「其實我未瞓，係喺度睇邊個跳錯，事後就話番畀佢哋聽。」

四人耳油未盡又抽問題「邊個最為食？」大家又再指向天華，當再抽到「五位最愛食嘅嘢？」小春指天華最鍾意食煲仔飯，仲要加臘腸、膶腸，旁邊錢嘉樂口快快爆「佢仲要無啦啦去澳門食。」一班人就靜晒，小春忍唔住笑話「去澳門食煲仔飯。」跟住林曉峰話「唔好再講，出事啦，佢呢幾日都話唔喺香港啦。」錢嘉樂笑到震晒話「遲啲唔係排舞都要去o個度瞓。」林曉峰攪爛GAG指天華最愛食「位」，因為去邊度都要插住對手入袋，然後「牙」起對手嚟行。玩到最後一條「邊個最鍾意睇靚女？」天華就爭住認埋，點知大家反而唔同意，佢哋覺得最鍾意睇靚女係錢嘉樂，因為喺戲中安排好多靚女畀佢哋。

精選娛聞，喺晒《娛果》
http://fb.com/appledailyent

鄭伊健、林曉峰、錢嘉樂：
Hair : John Chung @Barbieri Privata
Make up : Will Wong @ WiLL makeup
陳小春、謝天華：
Hair: EchoWan@Headquarters
Make Up: Eleena Yu
場地提供：帝都酒店