32歲鍾嘉欣上年與拍拖8年嘅伍允龍分手，之後佢就返咗加國療情傷，透過家姐認識大佢13年嘅脊醫Jeremy，拍拖10月就喺上年年尾拉埋天窗，今年2月先喺溫哥華補擺喜酒，兼公佈有B，仲話明要為老公生4個小朋友，到咗8月，嘉欣BB就生咗囡囡Kelly，早前已講過嘉欣BB喺11月3日喺香港出騷，今年12月返香港接廣告、接劇。

今日有周刊話因為嘉欣BB喺加國生活幾悶，有心想湊埋囡囡返香港，嘉欣BB年底就會返嚟接廣告，更指佢會加入拍《溏心風暴3》，估唔到嘉欣BB婚後唔夠一年，就同老公Jeremy分隔兩地。

據周刊指，雖然老公Jeremy好錫嘉欣BB，不過因為老公工作時間長，而且平時愛睇書、釣魚，過咗熱戀期，似乎慣咗香港繁榮方便，搵朋友又就腳，令嘉欣BB想返香港。

報道又指，本來老公Jeremy都唔同意，不過嘉欣BB覺得囡囡Kelly仲細，又要食母乳，同埋囡囡一齊返港，喺嘉欣BB身邊會好啲，所以鍾媽都會陪埋返港，有傳佢哋為咗呢件事嘈過幾次，嘉欣BB亦答應會兩地飛，多啲返加國陪老公。