當年今日
關於我們

【亞視冇糧出】「例行躬事」 葉家寶再向員工鞠躬:行政長官等緊股權變動

蘋果日報 2014/12/11 06:00

蘋果亞視鞠躬出糧即時

日前港九工團聯會幾名代表到高等法院外抗議,不滿亞視未依時向旗下員工支付11月薪金,影響800名員工薪計。亞視公關部證實,亞視全體員工至今仍未收到11月的薪金,仲話管理層正積極與股東協商,希望可以盡快解決發放工資問題。而勞工處已向亞視發出勸喻同警告。(新聞連結: http://bit.ly/1updIJu )

今日亞視又有活動搞,叫做「亞洲會聖誕新年金曲夜」,有魏秋樺BB、唔該你啦張立基、柳影虹等等。呢個活動係「亞洲會」唔係亞視,即係「影子亞視」幫手搞嘅,如果你話亞視做乜冇糧出仲搞活動,佢都可以話係亞洲會班members搞嘅。

個活動下午兩點喺亞視總台舉行,但下午12點左右,發生咗一件奇事:亞視執董葉家寶落嚟向員工鞠躬,話依家班股東冇人肯畀錢出糧。葉家寶又表示,依家傾緊買家傾緊,希望十日內有股權變動,仲爆咗句:「行政長官等緊我哋有股權變動。」據亞視員工透露,今次已非葉家寶首次向員工鞠躬致歉。之前亞視出唔到九月糧時,已經鞠過兩次躬。

其實早於日前(8日),亞視股東之一、台灣旺旺集團主席蔡衍明,要求高院委任獨立監管人加入亞視董事會一案,法官裁定蔡衍明勝訴,批准委任兩名獨立監管人加入亞視,並要尋求投資者,向大股東黃炳均購入最少10.75%股權,令他不再成為大股東。而其時亞視發言人稱,管理層正積極與股東協商,希望盡快解決發放工資問題。