【回家瘋狂慶祝】沙拿軒達臣齊抱B 紅軍球迷驚覺有玄機
蘋果日報 2020/02/10 04:00
穆罕默德沙拿歐聯四強佐敦軒達臣巴塞隆拿紅軍利物浦
沙拿（右）同軒達臣今周齊齊抱B。
英國《太陽報》周六報道就話，利物浦球星穆罕默德沙拿同隊長佐敦軒達臣今周再做老竇，兩人一齊迎接蘇蝦哇哇落地。咁啱得咁蹺，兩位BB仔齊齊出世，英媒就追溯返9個月前，原來就係紅軍喺歐聯四強次回合反勝巴塞嘅喜慶日子，球迷就猜測兩位紅軍球員贏波後太過興奮，返屋企同太太瘋狂慶祝喎。
9個月前，利物浦喺歐聯四強對陣巴塞隆拿首回合落後3球之下，次回合上演奇蹟之夜主場大勝4:0，兩回合總計反勝巴塞4:3晉身歐聯決賽。咁開心嘅晚上，兩位球星唔知係咪太興奮呢，就連受傷冇落場嘅沙拿都瘋狂慶祝埋一份，造就咗兩位BB巧合地喺非常接近嘅時間出世。
本身已經有位囡囡嘅沙拿，再迎來細囡嘅出生，至於軒達臣今次亦添返位男丁。當然喇，消息係未經兩位當事人證實，不過就要讚吓紅軍球迷咁心思細密留意到喇。
-------------------