「秋官效應」散戶聞之色變，原來仲有個比秋官效應更勁嘅指數──「摩天大廈指數」（SkyscraperIndex）。華華睇《華夏時報（北京）》就提及呢個「摩天大廈指數」。大家唔好按字面解，以為佢係個全球摩天大廈鬥高指數，其實呢個指數由經濟學家AndrewLawrence建立，佢將全球最高摩天大廈落成同經濟危機聯繫起嚟，簡單嚟講，當摩天大廈落成時，即係標誌着經濟衰退來臨。

上海WFC完工　股市急跌

呢個「摩天大廈指數」唔係吹水，有數據support，仲屢應不爽㖭。遠嘅唔講住，先講大家都熟悉嘅中環國際金融中心（IFC）二期，03年落成即遇到沙士打擊。你以為係偶然？1931年落成嘅紐約帝國大廈，就正值美國大蕭條；70年代初完工嘅紐約世貿中心同芝加哥西爾斯大廈（SearsTower）就經歷第一次石油危機；98年落成嘅吉隆坡雙子塔就遇到亞洲金融風暴，聽落都咪話唔邪。
今年，全球經濟受美國次按拖累，咁啱得咁蹺，大陸喺上個月又有幢新嘅全球第一高摩天大廈落成，就係取代台北101嘅上海環球金融中心（WFC）。據報道，家吓內地經濟增長放緩，股市急跌超過五成，搞到WFC家陣嘅辦公室出租率只有四成五，真陰功。
其實，香港都有幢標誌性建築物落成入伙，就係由新地（016）興建嘅九龍站環球貿易廣場（ICC），將取代國金二期（IFC）成為香港第一高商廈，無獨有偶，喺呢幢ICC落成之際，香港經濟又唔係咁掂，咁搞法，香港投資者除咗要留意「秋官效應」，家吓仲要再兼顧個「摩天大廈指數」，兩者前後夾攻，睇嚟投資者今年都係小心為妙。

摩天大廈指數

-中國-
‧摩天大廈：上海環球金融中心　落成年份：2008
經濟：美國次按危機蔓延，拖累全球經濟放緩

-香港-
‧摩天大廈：環球貿易廣場（ICC）　落成年份：2008
經濟：美國次按危機蔓延，拖累全球經濟放緩
‧摩天大廈：國際金融中心二期（IFC）　落成年份：2003
經濟：沙士危機，打擊百業蕭條

-馬來西亞-
‧摩天大廈：吉隆坡雙子塔　落成年份：1998
經濟：亞洲金融風暴爆發，亞太股市急瀉

-美國-
‧摩天大廈：芝加哥西爾斯大廈　落成年份：1974
經濟：石油危機，全球經濟陷入衰退
‧摩天大廈：紐約世貿中心　落成年份：1972
經濟：石油危機，全球經濟陷入衰退
‧摩天大廈：紐約帝國大廈　落成年份：1931
經濟：美國經濟大蕭條

電郵：mailto:[email protected]