由宋仲基、蘇志燮、黃政民、李貞賢、童星金秀安等人主演嘅韓片《軍艦島》，耗資220億韓圜（約1.5億港元）拍攝，將於下月喺韓國上映，香港方面亦定檔於8月上映。《軍艦島》被視為韓國今年最賣座嘅電影，片商近期頻頻公開海報、預告片宣傳造勢，不過噚晚就有網民於網上爆料，指片中臨時演員嘅時薪比6,470韓圜嘅最低工資（約44.5港元）仲要低。

噚晚有自稱係片中臨時演員嘅網民於網上爆料，表示佢每日都要拍攝超過12小時，片酬比最低工資仲要低，於炎夏拍攝時即使臉被曬到燒傷嘅程度，佢哋都唔畀擦防曬，工作人員更笑言咁樣反而更貼近真實。網民又批評導演只向工作人員及有事務所嘅演員提供雪糕等冰涼食品，但無視現場約40名臨時演員。網民形容自己就好似片中嘅故事一樣，被強制徵用。

文章公開後引起網民熱烈討論，有人指導演曾公開感謝一眾臨時演員，認為導演並冇忽略佢哋，亦有網民表示長時間拍攝於韓國演藝圈係好常見嘅事，之後爆料嘅文章已被刪除，而《軍艦島》製作方今日就回應：「有關臨時演員工資一事，並唔係事實，當中只有5場戲要拍超過12小時，事前已得到工作人員及演員嘅諒解，另外亦有支付額外工時嘅工資。」