36歲加拿大男星凱頓基斯甸臣（Hayden Christensen）代表作係於《星球大戰前傳》扮演少年版黑武士Anakin，佢同拍拖近10年嘅女友Rachel Bilson被爆已經分手。

據美國雜誌《US Weekly》報道，凱頓同Rachel已經分手兩個月，現時Rachel喺洛杉磯，而凱頓就喺多倫多居住，知情人士話佢哋已經正式玩完。凱頓與同齡女友Rachel Bilson喺2007年拍戲邂逅，一年之後訂婚，其間一度分手，不過好快就復合，佢哋育有一名將滿三歲嘅囡囡。