吳君如擔任由《蘋果動新聞》舉辦嘅第一屆《最港電影大獎》頒獎典禮，先頒發「我最喜愛港片」（拆彈專家）；「評審團最港大獎」（一念無明），之後就頒「最港女演員」。大會司儀嘅CK同動主播Sapna問君如要做女主角有乜嘢秘訣呢？佢話：「劇本好，導演好，演員好，要各方面配合先可以做得好。」

頒發「最港女演員」前，搞笑嘅君如就將「最港女演員」講成最「港女」演員，恭喜晒！係《空手道》嘅鄧麗欣（Stephy）得獎！之前Stephy已憑該片奪香港電影評論學會最佳女演員。

Stephy上台領獎講得獎感言時謂：「2016年好似好耐，我演過電影九成港片，八成係演港女。」眾笑。

Stephy繼續話：「《空手道》個角色其實都係港女，今年好豐收，不過劉德華先生喺度，我唔敢話自己努力，我只係叫做默默耕耘，等待俾人留意。藝人同媒體關係好得意，好似情侶咁，互相猜度，互相競技，互相磨合。

「今日《蘋果》頒呢個獎，我覺得好似情侶開花結果感覺。我會繼續努力，希望唔會令大家失望。」

場地：香港東隅