台灣型爸賀軍翔（小美）喺今年6月，毫無預警咁宣佈自己已婚誕女，消息震驚中港台（新聞連結： http://bit.ly/2hXYKj2 ），雖然係咁，好彩班fans都好理智，大方送上祝福，而小美亦間唔時update吓囡囡啲得意相，噚日「七夕」，佢都有貼到囡囡陪佢（但小美話係監視）睇劇本嗰啲相出嚟，好鬼溫馨。

不過，小美已經呢件事好似仲未夠揚，話說今日小美喺Instagram貼咗佢同鍾欣潼（阿嬌）喺台北夜巿影嘅合照出嚟，相信係為佢哋合演嗰套大陸網劇《動物系戀人啊》開工，小美留言話：「台北的夜市取景，都流口水啦！誰是吃貨呢？」相中似由小美揸機selfie，阿嬌挨近佢膊頭，V咗手，幾friend咁㗎！

點知有位網民就不停以英文留言問小美，問相中女子（即係阿嬌）係咪佢女友，又叫小美「請你回答我的問題」，然後讚阿嬌靚女，又話自己好鍾意小美，仲好笑到走去tag同小美多次演過螢幕情侶嘅楊丞琳話「賀軍翔女友」。

最後，有人「解開謎團」，話小美已婚有小朋友，該網友話知道，但以為小美「沒有女朋友」。再睇埋其他留言，知道阿嬌係星嘅好似唔太多，亦有人出聲為阿嬌澄清係星唔係小美太太。

咁順便補充番，《動物系戀人啊》係由《惡作劇之吻》及《我可能不會愛你》等大熱台劇嘅導演瞿友寧執導，仲有靚媽隋棠、「不死立立」洪卓立都有份參演，早前已經喺台灣勁低調咁開咗鏡。（新聞連結： http://bit.ly/2wet7qy ）