民望已跌至谷底的特首林鄭月娥，最終要在顧全建制派選舉形勢下，暫緩修例，但外界批評她毫無悔意，拒絕撤回，態度依然目空一切。有學者認為，餘下3年將有很多人拒絕與林鄭合作，甚至杯葛她，「整個社會都會鄙視佢」。前問責官員高官王永平更以「不堪想像，舉步維艱，一事無成」來預視林鄭未來3年的管治：「連任？唔使諗啦！」

林鄭硬推「送中」條例，將她的民望拖至谷底，逾100萬人遊行高呼「林鄭下台」，將林鄭的民望拖至低位，遊行後林鄭的民望將會跌至甚麼水平，料成短期焦點。前公務員事務局局長王永平指，林鄭月娥在今次事件予人感覺態度強硬：「就算有人流血，佢都企硬。」他指，如今人人也知道是中央派專責香港事務的中央港澳協調小組組長韓正南下，才令她讓步：「佢仲有咩管治嘅權力？咁對一國兩制、高度自治係沉重打擊。」

王批評林鄭在記者會上「一句道歉都唔講」，難以恢復市民對她的信心：「我相信打後嘅民意調查都會反映呢個事實。一個失盡民望嘅政府同特首，作出任何施政，市民都會用好猜疑同唔信任嘅角度去睇。」他認為，政府既然今次轉軚，林鄭最起碼也應該在記者會上鞠躬道歉，「乜都唔做，然後話自己做咗40年公務，話有好多嘢想繼續做，佢咁嘅態度，我真係睇唔到未來幾年，佢可以做到乜嘢出來。」

王又批評林鄭在過往兩年「乜事都做唔到」，房屋、醫療也做不好，「兩年來做咗啲乜嘢呢？政府做唔到嘢，就走去搞《逃犯條例》，但官員好似李家超呢啲語無倫次，話內地司法制度排名好高，政務司長張建宗竟然話政府係受害者，咁你就可以睇到呢班官員嘅質素。」

王又指，林鄭在今次事件後難以連任，因為市民已對她非常反感：「連任？唔使諗啦！」他又指，林鄭民望如此低殘，不符中央選人的條件：「如果呢個情況一路落去，而佢冇做出任何成績去挽回低處未算低嘅民望，我睇唔到中央點解會考慮畀佢連任。」

中大政治與行政學系高級講師蔡子強亦認為，餘下3年，很多人將會杯葛林鄭，拒絕和她合作，整個社會也會鄙視她：「呢個政府冇咩可為，我最擔心佢急於翻身，因為佢能力唔高，又急於翻身，就會變成蠻幹，到時會出更多問題。」

科大社會科學部副教授成名指，林鄭在未來3年，但凡要推出任何涉及中港關係的政策、大型改革，將面對更大阻力，「因為大家會以陰謀論眼光去睇佢。」成名指，林鄭在記者會上的咀臉很傲慢，既沒懺悔也沒道歉，「佢嘅民望持續低迷機會極高，民望大升亦都係不可能。」

自由黨榮譽主席田北俊則為，日後管治還要視乎不同的政策內容。民主黨立法會議員涂謹申則指，市民不會貿然上街遊行，現在市民對政府已信心盡失，對林鄭更是「見你前面，憎你後面」，勢令日後管治添上困難。

昔日新聞：電視辯論互叫熄咪 曾：你係撕裂2.0 林鄭：會順應民意辭職

相關新聞：【不斷更新】全港大中小學學界聯署「反送中」

【引渡惡法●懶人包】大律師公會逐點K.O.政府修例理由
【引渡惡法●懶人包】一文睇晒立會法律顧問7點質疑修例

民陣6.16反惡法遊行

日期：6月16日（日）
集合地點：維園
時間：下午2時30分集合、3時正起步
遊行路線：維園至金鐘添美道立法會
（資料來源：民陣）

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多