農曆七月都就過啦，唔少鬼片都仲上映緊，嚟緊21號就會上映台灣嘅鬼片《紅衣小女孩2》喇，電影公司就安排咗啲宣傳，就係搵咗兩隻港版紅衣小女孩，噚日喺旺角遊街、搭車，仲買飛睇《紅衣小女孩2》。雖然日光日白，但係兩隻鬼都嚇到人，有啲市民見到就即走、有啲市民就驚到係咁話：「記得打格。」

據電影公司陳先生話：「《紅衣小女孩2》喺台灣票房已經超過1億，係台灣有史以來最高票房嘅鬼片，因為許瑋甯下星期四（21日）會嚟香港做首映兼宣傳，咁今日係上畫前嘅最後一個weekend ，我哋想做啲有 Gimmick 嘅嘢，搵咗宣傳車喺旺角派雨衣同喺戲入面好有用嘅五雷符，另外就安排左兩個女仔，扮戲入面嘅小女孩喺旺角行，希望做到個宣傳作用，可以承接到台灣嘅爆炸力，部戲喺台灣口碑好好，喺嚟緊嘅金馬奬提名，應該有唔錯嘅成績。」