【李八方online】湯家驊染紅眼症 半邊面唔見得人
湯家驊李八方ONLINE紅眼症民主思路
早前因為山竹來襲而後花園遭殃嘅行會成員兼民主思路召集人湯家驊(Ronny),認真禍不單行!唔單止因為「山竹」令家中兩棵大樹跌落鄰居家中,損失慘重,日前去張家界旅行更加不幸惹上紅眼症,今日佢舉行傳媒茶聚就全程「擰歪面」,仲請大家高抬貴手,唔好影佢隻紅眼添!
八方今日一見Ronny就立即發現佢非常唔妥,右眼紅到雞蛋咁大,腫到完全打唔開咁,更加不時標眼水。佢透露日前去張家界旅行5日,當地連場大雨令佢「底褲都濕埋」,可能不時要用手抹面上雨水,搞到病毒入侵右眼,噚日落機已即時睇醫生,但都無法阻止發炎情況。發炎咁嚴重點解茶聚唔改期?Ronny話今早先發現咁大件事,惟有頂硬上。
咁辛苦都要搞茶聚,事關民主思路下月26號要舉辦《生生》電影籌款晚會,希望籌得200萬元經費畀智庫下年運作,今次會賣600張飛,暫時賣出三分一左右。Ronny貴為行會成員,今次主禮當然唔少得有特首林鄭月娥喇,亦都有電影主角金像獎最佳女主角鮑起靜,而佢亦請咗70名立會議員、行會成員同其他主要官員,但就未統計有邊個出席。
立會補選新聞,《蘋果》一網睇晒:
http://bit.ly/appledaily1125