去年不少歌迷都期待歌神張學友會喺入行卅周年時舉行演唱會，大家苦等嘅時候，學友都冇放慢腳步，佢經已靜靜地為全新演唱會作準備，今日佢以fit爆狀態，現身尖沙嘴洲際酒店，宣佈將於12月4日開始、假紅館舉行二十場《A Classic Tour學友．經典世界巡迴演唱會》，喺經典金曲《每天愛你多一些》伴奏下，企上像真度極高嘅小型紅館，連學友都忍唔住話想行落台睇下有幾似。

今次演唱會以「經典」為主題，學友指自己已經有五年冇喺紅館開騷，超過二十年無喺紅館舉行四面台演唱會，記得上次四面台經已係1995年演唱會。學友話：「想再做一次四面台，呢個都係經典嘅事，亦非常講求體力，我都係搏一舖，想留畀自己一啲經典感覺。」

獲公司花費百萬舉行記招，學友坦言有一定壓力，原因排好歌單流程表後，發覺今次係完全挑戰自己體能極限演唱會：「以前演唱會都冇咁大挑戰性，做完之後會覺得唔夠挑戰性，今次趁自己仲可以做到就最大挑戰，好似四面台已經係體能上好大考驗，但又想做一啲好玩嘅嘢。」問到係咪打算騷六嚿腹肌？佢話：「我唔會，挑戰呢啲，留畀後生仔做。」

學友一向尊重幕後合作團隊，今日記招前先筵開17席自助餐，招待工作人員及傳媒，並介紹重要功臣如奚仲文、陳華國、吳慶隆、李國海等上台。記招上，大會又特別剪輯咗一段來自周星馳電影《破壞之王》中、星爺撲學友演唱會飛片段，學友睇完條片之後話：「片中係我1993年演唱會海報，事隔23年仲夠膽拎出嚟播，非常感恩呢幾十年對我嘅支持，希望我呢幾十年做嘅嘢無令人失望，我會再做好啲。」