有云「東家唔打打西家」，對於施永青，下聯可能是「西家唔返返東家」。在跑數維生的地產代理世界，施永青採取「好草不怕回頭吃」、不管海軍或水兵打贏對手就是好兵的用人之道。

施永青說：「起初同事都唔理解我對員工採取嘅政策。即係員工走，有句話叫『好馬不吃回頭草』，呢句話唔啱嘅。應該就叫『好草不怕回頭吃』。嗱！你而家離開，我無當你叛徒㗎，你覺得呢邊啲草甜美啲，咁下次咪返轉頭囉！隨時歡迎。啲同事話：『施生咁都得嘅！中原咪變咗無掩雞籠！』我話無掩雞籠有咩唔好，來去自由，你估真係好似特朗普要起圍牆咩。有遷徙自由…搵工自由吖嘛，呢陣時你唔開心，咪出去兜個圈囉！我搵行家培訓下先，第日再返嚟囉！」

他記得有一次出席某發展商的周年晚會，該公司很多員工獲10年元老獎，他說：「席間有啲擦鞋友話：『你間公司好好歸屬感喎！咁多人攞十年元老獎嘅。』我心諗，呢班友真是無出色，做咗十年仲喺度做，梗係要出去見吓世界。我即刻返去同同事講，你哋有毛有翼要出去飛先得㗎。成日喺處吽，阻住地球轉。」

言下之意，嫌員工老化？他回應：「個人感覺唔會付諸實行，佢未違反3個標準（不蝕錢、不輸行家、不反艇）。佢仲會話：『咩老化，我仲幫你賺緊錢，打低對手喎！』我合作夥伴就駁：『梗係啦，對手弱咋嘛，其實海軍鬥水兵。』但鬼叫佢哋好彩對着水兵，對著水兵夠殺就算啦！獵豹夠快捉到隻羚羊咪夠囉，唔通練跑咩！但如果碰着鏈家，唔係無進步咁簡單，係被淘汰！」

他指出，自組織理論當中提及員工不需要追求卓越，「僅僅夠得㗎啦！」因為追求卓越會失去適應能力，越卓越的東西，適應能力越低，例如食蟻獸嘴尖脷長，天生擁有食蟻的卓越設計，但太善於食螞蟻，結果除了螞蟻，就不善食其他食物。

「即係如果一個人太專於某一樣嘢，就缺乏適應能力。所以我認為唔使太卓越，我哋請啲普通員工㗎啫，如果個個精英，要搵千里馬，又要搵伯樂相馬，公司好難壯大，周街有眼耳口鼻就搵一拃過嚟幫手就夠。」

記者：陳家雄

investMAN
For People of Style & Substance
掌握理財智慧 感受生活品味