當年今日
關於我們

【短片】【笑到有腹肌】孖胡楓扮「都敏俊」譚炳文笑咪咪:個肥婆要「屙督茄」喎﹗

蘋果日報 2015/02/07 06:00

蘋果紅館江南Style胡楓崩牙駒朱咪咪即時譚炳文都敏俊張耀榮FantasticBaby耀榮叔董趙洪娉我做晒

噚晚朱咪咪喺紅館開個唱,爆笑連場,當中有一part佢就話怕大家覺得佢剩係識唱舊歌,所以加咗啲新嘢,現場就即時播出《江南style》同埋《Fantasticbaby》,但係咪咪姐只係隻手郁郁下,又冇跟住唱都冇跟住跳。

之後就播出《來自星星的你》嘅主題曲,咪咪姐就話要請出「80後組合」,之後台中間就出現兩個著住西裝,梳咗個都敏俊髮型嘅男人,原來係胡楓同譚炳文,咪咪姐仲係咁講韓文:「Oppa(哥哥)、『噩dog茄』(怎麼辦)同『geaen餐拿喲』(沒關係)。」

譚炳文就話:「個肥婆係咪叫我哋?佢仲話要『屙督茄』喎點搞?」修哥就話:「唔好理佢啦。」咪咪姐就再講:「嗲!嗲!嗲!」

譚炳文就同修哥講:「佢0依家仲要講埋粗口喎,嗲我喎,點算?」修哥就話:「咁你嗲返佢啦。」嗲完一輪之後,咪咪姐就話:「你做咩講粗口嗲我?」譚炳文就話:「係你嗲我先,我先嗲返你。」咪咪姐就話:「你都冇睇韓劇,我個『嗲』係解yes咁嘅意思呀!」

咪咪姐又話佢哋做咩睇佢唔到,譚炳文就話:「成pat蔭遮住點睇呀?咩都睇唔到。」修哥又笑咪咪姐發花癲,話佢叫人做嘉賓都要扮嘢。

譚炳文就話:「0依家啲髮型,係要搞到啱啱瞓醒咁先得。」咪咪姐之後話:「見到佢哋兩個升上嚟,個心真係卜卜卜卜咁跳,差啲跳出嚟。」修哥就話:「你個心跳係啱嘅,唔跳就大鑊喇。」咪咪姐即刻粗聲粗氣話:「0靚仔你0依家係咪玩嘢呀?」

跟住打算唱歌嘅時候,咪咪姐就見到修哥流口水,就話:「都係等我幫你抺返啲口水先,修哥見親我都係咁,流晒口水。」