前無綫新聞財經「孖寶」范巧茹同林小珍，去年底先後離職，有指二人因為工作量太多頂唔住，型到要「裸辭」。(相關新聞﹕ http://bit.ly/2fgXqDL )

離職接近一年，范巧茹同林小珍都有新去向。前日下午四時半，記者發現范巧茹同林小珍，及「生女要似趙海珠」嘅珠珠喺金鐘太古廣場一間西餐廳high tea。三人已經唔再係主播，但衣著言談仍然好有主播風采，賢淑端莊。只係鏡頭背後都要放鬆一吓，除咗見到林小珍講到手舞足蹈，范巧茹扁扁嘴，仲有珠珠托腮樣，都幾kawaii。

期間見林小珍最多嘢講，同范巧茹傾到雞啄唔斷，反而趙海珠間中都會睇吓手機。大約半小時後，趙海珠最先離開，佢哋都好均真，拎住個餐牌對番自己食咗幾多錢嘢，然後AA制。不久，林小珍去完洗手間後離開，最後由范巧茹負責埋單。

范巧茹噚日都有喺facebook分享一張合照相，仲hashtag﹕#三個靚媽#三個HEA媽#親子#雞啄唔斷，范巧如接受《蘋果》電話訪問時亦有透露近況，佢話：「我同小珍o依家都係做part time，我喺《信報》工作，自己度好大，講番股巿同理財，會喺facebook播。(現在開唔開心？)學識好多製作知識，剪片、拍嘢、打燈、收音都係one man band，但做得幾開心。」佢話同小珍較熟，之前因為一個節目邀請過趙海珠做嘉賓，所以間中都會約見面，佢話：「我哋都係傾吓湊仔經，我個女細小珍個女3個月，珠珠個女又細我個女幾個月，好近。」而林小珍現在就喺網台工作，佢話：「會做《港股策略王》同《民眾證券》，得閒做吓MC，全部都係part time。主職湊女，工作好開心呀，零壓力。我地係閨蜜，成日會見架。」