居於高層單位的伍小姐坦言,擔心病毒會經風向入屋,故現時已關閉家中所有窗戶,平常出入都會用消毒噴霧消毒。伍指,得悉有中層住戶已撤離屋邨,自己則要視乎港府下一步措施後再作打算,惟目前亦感到徬徨不安,「驗咗之後都唔知佢(政府)下一步有咩行動」。伍又稱,若是屋邨喉管設計有問題,擔心其他座一旦出現患者,會步康美樓後塵爆發疫情。
居住在中高層、接近13及14室的陳先生坦言,雖然擔心疫情會繼續惡化,但現時亦唯有等待政府進一步安掛,「做好自己囉,勤啲清潔屋企,如果要隔離都冇辦法」。被問到是否已作最壞打算,陳無奈表示「冇得揀」,亦不會考慮到親友家中暫避,「唔好害咗人哋」。
當區區議員何偉霖指,今日收到非常多住戶查詢,「打嚟問需唔需要即刻撤離」,有住高層、接近患者單位的居民,現時已不敢打開窗,擔心「擾流效應」將病毒帶入單位。何又認為,若證實有「擾流效應」,不能排除其他屋苑亦會有類似情況,屆時將演變成全港所有地區的問題,呼籲港府及早制定對應措施。
另外,何偉霖亦促請房署亦為該大樓的私人單位檢查喉管,「做開點解唔做埋呢?私人去做相比之下係冇政府部門咁專業。」何亦指,暫時未收到當局到亨泰樓做煙霧測試的通知,據悉要待風勢較弱時再進行,食環署日前已到涉事兩個單位進行清潔。他又指收到兩個已入住駿洋邨的家庭投訴,指單位內被鋪及毛氈感覺質素差,食物難吃,亦沒有電視或洗衣機,小朋友情緒低落,今日會送玩具及毛氈給相關家庭。
袁國勇昨(16日)在電台節目上指,亨泰樓涉事單位的U型渠或喉管均沒問題,故肯定不是「淘大2.0」或「康美樓翻版」。另外因34樓住戶與32樓住戶不是用同一部升降機,34樓住戶亦因患有慢性病甚少外出,故必須考慮「擾流效應」的可能性:「當個風速好弱,好似飛機翼啲空氣繞返轉頭,托起飛機向上走;等於空氣經屋頂向下捲,沿住天井向下走,病毒最濃一定係最上面。」故當局當日將最上面6層住戶撤走。
他估計居民起碼要從撤離當日計10天後才能離開隔離中心,並指如其他屋苑有頂層住戶發現喉管相對短,並聞到廁所外來臭味,加上樓下有住戶確診,便應關窗自保,因如風勢較弱或無風,霧化的病毒較難吹散,向下沉後可飄入屋。
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》
讀果 上架