今日係海俊傑娶妻大喜日子，由彭敬慈任伴郎，傅穎做伴娘，兩人仲一齊受訪。問長居北京嘅傅穎有冇帶埋男朋友嚟？佢就支吾以對。咁有衝動想結婚？傅穎笑稱：「暫時未囉！可能過多兩年啦。」咁依家個男朋友係咪結婚對象先得0架？佢就話「唔知」：「未來嘅嘢好難講。」求婚未？答案係未：「我一向唔會做主動，就算係追求，我都未試過做主動。」

傅穎又話噚晚失眠，可能係唔太適應啲時間咁啦(應該唔關時差事啩…)。咁耐冇返香港，佢話今次會留多幾日。

彭敬慈呢，佢話自己都做咗好多次兄弟喇，但佢本人呢，亦已經三年冇拍拖喇。「做過五次兄弟，兩次伴郎，我已經驚娶唔到老婆，希望做埋呢次唔做啦。」

彭敬慈同傅穎一樣，依家長駐北京，所以冇乜機會識到心儀對象，朋友都笑佢係「冇腳嘅雀仔」：「家陣我好free，亦好享受依家嘅生活，冇拖拍就冇煩惱。」擇偶條件就係性格善良。

講番今早接新娘環節，兩人異口同聲話都係冇乜特別，只係行下石春路咁、食下wasabi咁，傅穎笑言：「佢班兄弟好叻，好快就估到。我哋本來諗住罰啲兄弟濕吻三十秒，但佢哋玩完啲遊戲都冇輸過，所以唔使罰。」開門利是有幾多？傅穎笑言頭先唔記得拆，所以都未知。

翁虹獨自一人出席婚宴，佢話嚟祝福海仔，仲話送現金最實際，其實同佢認識廿年，自己剛喺廣西拍完電影，後日生日就會同朋友慶祝。工作方面，翁虹話正籌備汶川大地震嘅紀念電影《燃燒夢想》，會負責策劃，兼且會做愛心大使，因為媽咪係四川人，戲中會演護士，仲搵埋譚詠麟、李克勤、許志安演唱電影宣傳歌曲。

之後，陸續有賓客到場，包括：姜大衛、連凱、李燦琛、何華超等。