路維100勝到手！經過周日洲際國家盃B組最後一輪分組賽領軍3:1擊敗喀麥隆後，德國教練路維攞到帶領國家隊以來第100場勝仗，除咗係德國史上第一人達到呢個里程碑，佢自2006年7月接替奇連士文執起教鞭，亦只花咗150場波就造出100勝27和23負嘅佳績，勝率高達66.7%，連埋2014年世界盃冠軍嘅功績，稱佢為德國歷來最成功教練絕不為過！

57歲嘅路維表示：「我好高興，100場勝仗係個美妙嘅數字。佢亦提醒我喺作為國家隊教練嘅漫長日子，要向所有同自己緊密合作嘅人致謝。全因佢咃嘅成就、投入感、熱情同完美態度，令我哋贏得咁多勝利，為國家隊帶來成功。」不過，對於球隊挾13場不敗走勢，喺周四火併墨西哥爭入決賽，路維亦唔敢掉以輕心，表示球隊甚少同中美洲球隊交鋒，所以要保持警惕。