急急賣地賣版權套現,亞視員工今日終於收齊一月份及十二月份嘅薪金。由於事出突然,好多藝人今日都未有即時返去大埔總台領取支票。
喺亞視做咗超過廿年嘅劉錫賢接受《蘋果》訪問時話﹕「未囉呀,冇理由山長水遠返去,但都戥其他同事開心,過嚟前出齊糧,好事嚟。」佢形容亞視依家只能見招拆招,好彩又畀佢過完一關又一關,但提起王征就只得一個字﹕「唉.....。」話唔識點評論﹕「真係nocomment,哈哈哈,唔知佢想點?即使最後要清盤都冇辦法,但我哋渴望仍然有希望喺前面。」
葉家寶宣佈出糧消息時,六合彩之子蔡國威BB就買緊新衫過年,佢話﹕「我諗住初七先返公司攞,聽講係現金票,咁大間公司唔會彈票啦。」佢對亞視前景信心都係一半一半,因為獲委任為亞視經理人嘅德勤中國華南區主管合夥人黎嘉恩受訪時話王征係一位非正常嘅亞視債權人,可能想來個「一拍兩散」,認同將亞視清盤再重組,可能係更好嘅處理方法。(新聞連結: http://bit.ly/1CH5vpV )
問威仔覺唔覺王征好自私?佢話﹕「無疑大家都咁覺得啦,投資冇話一定賺,冇理由蝕咗就要追番晒,都唔makesense,輸打羸要。希望佢為員工、為公司、為埋自己都要諗清楚。」
而張家瑩都話趕唔切返公司攞票,佢話﹕「可能初五、初六先啦,我仲有年幾合約,對公司依然有信心㗎,相信過年後件事會更加白熱化。」