豬肉檔長期缺人，業界叫苦連天，僱員再培訓局終落實5月開辦課程。為吸納新血入行，局方特別搵嚟年輕靚仔「刀神」做課程宣傳大使，仲以「豚肉刀神 專業過人」作為宣傳口號，希望招攬失業同待業人士報讀。再培訓局好友同八方講，好多人都覺得呢行老化，冇乜吸引力，所以特別搵個年輕有活力嘅model扮刀神「賣肉」hardsell，下月13日局方會舉辦大型宣傳活動，邀請咗小儀做主持；22日有簡介會及招生日。
課程暫定先開兩班，分別為「屠宰員基礎證書課程」及「豬肉切肉員基礎證書課程」，名額各20個，培訓期120小時，學費全免，學員畢業後更會獲參與計劃嘅僱主承諾優先聘用。

修畢獲聘月薪可達萬三

完成「屠宰員基礎證書課程」嘅學員，將獲五豐屠房香港有限公司聘為初級助理屠宰員，喺上水屠房工作。讀完「豬肉切肉員基礎證書課程」嘅學員，就會獲聘為肉類分割技術員，喺港九新界肉檔工作，前者月薪12,900元，後者更高達13,000元，人工隨時高過剛畢業嘅大學生。入讀門檻唔高，能閱讀一般中文、應付勞動工作同對屠宰或切肉工作有興趣就得，並無任何學歷要求。
豬肉課程終開班，女承父業嘅「女刀手」許穎欣拍爛手掌，但佢話唔奢望新課程吸引到年輕人入行，因以前都收過徒弟，好多返幾日就唔做，反而覺得對四、五十歲嘅低薪族較具吸引力。佢話由於人手短缺，行內有經驗嘅「炒散」刀手，日薪已由過去五、六百炒高至上千元。

李八方
mailto:[email protected]