對上一個樂壇頒獎禮，叱吒頒獎禮，陳奕迅因為不在狀態，成晚黑口黑面變黑面臣之外，喺台上仲離譜到開手機睇歌詞演唱，引來網民聲討，事後仲引起一片「評論潮」，好多博客寫文分析Eason黑面嘅原因。

咁今晚「十大中文金曲頒獎禮」開始，Eason狀態點呀?冇黑面啦!仲有笑容添!佢今晚仲著得好「四正」，一套老西就出席頒獎禮，同佢平時風格好唔同，相信歌迷今晚就放心啦，而話咁快Eason就奪得第一首嘅「十大中文金曲」，就係《任我行》啦。

至於頒獎禮開始時，先頒發十優歌手獎，得獎者分別係:吳雨霏、陳奕迅、李克勤、容祖兒、許廷鏗、G.E.M.、王菀之、謝安琪、張敬軒及薛凱琪。吳雨霏繼續以性感上陣，但祖兒雖然已到場，但就未有上台領獎，原來佢啱啱由上海工作返港，航機delay，所以趕唔到上台。