加入咗「文化界監察暴力行動組」嘅何韻詩，同其他加入嘅藝人一樣，會同學生市民一齊留守示威據點，今晚7點鐘，阿詩就素顏喺金鐘現身，佢話:「有時間去支持，噚晚凌晨有同學生傾偈，唔剩係見電視畫面及傳媒睇到嘅嘢。」

講到外間有啲人話沉默即係唔支持，阿詩就話:「唔係，有啲係食晏嚟支持，唔似外間咁講。」佢又話有同新加入嘅潘廸華聯絡:「大家唔好低估自己嘅力量，踏出一步大家支持，藝人做到市民都做到。」

講到今日有官媒撰文表示會將支持「佔中」嘅藝人列入封殺黑名單？阿詩話:「有睇，唉，呢個好悶呀，見呢啲訊息，我哋企出嚟為港人良知，連日嚟見學生爭取一件事，件事唔止為學生，係為所有港人爭取，當自己見到咁情況，唔可以隔岸觀火，自己亦做唔到，人除咗賺錢之外，仲有好多其他嘢。」

阿詩續說:「如果一啲人只為錢恐嚇你，呢啲人唔使放喺心裏面，做心中認為正確嘅事。企得出嚟價值觀有排位，封唔封殺理唔到咁多。」唔介意俾人話「吃裏扒外」？佢話:「唔緊要，連日來有內地市民支持及參予，我哋講香港人本身有嘅普選，為香港自己事發聲，並唔係反對同任何對立。同學生並肩作戰，唔止學生，係港人抗爭。」現場有人拍手叫佢加油，亦有婆婆同阿詩影相。