皇家馬德里球星基斯坦奴朗拿度（C朗）同女友佐真娜（Georgina Rodriguez）將會喺明年結婚。

葡萄牙傳媒《Correio da Manha》報道，C朗同已經大緊肚嘅佐真娜會喺明年拉埋天窗，確實日子仲未定，要睇吓葡萄牙喺俄羅斯世界盃踢成點，但報道話好大機會會安排喺8月份。

另外，由於佐真娜嘅salsa舞導師唔小心，意外洩露咗佢肚入面陀住嘅原來係BB女。據雜誌《Hello！》早前報道，C朗送咗隻價值232,000鎊嘅五卡鑽戒畀大肚女友佐真娜，似乎係訂婚戒指，而佐真娜最近就學跳salsa舞，仲喺Instagram鋪相，話跳舞令人開心，又多謝兩位導師Basi同Deisy喺第一堂salsa嘅指導。點知導師嘅回應就出事喇，除咗留言話對於喺佐真娜喺第一堂嘅表現好滿意，又話佢陀住嗰個細路女將會係一個偉大嘅舞者，無意中透露咗已經有7歲大囝同一對龍鳳胎嘅C朗，屋企再增加嘅成員將會係B女嚟。至於salsa導師意外洩密嘅回應，後尾就畀眼利嘅網民留意改咗做好開心可以教佢salsa。