「如果你話咁樣係違法嘅行徑，咁你拉咗警察同政府先，我認為我𠵱家所做嘅，係義不容辭」。人稱天幕工程師的何伯，自看到警方打學生開始，每晚留守旺角，通宵搭帆布為留守者遮風擋雨，搭竹枝、掟水樽掛繩 ，技巧純熟，令佔領者驚嘆。清場日逼近，他無畏無懼，「你要清場冇所謂，無論點樣拆，對我都冇影響，一邊拆我一邊起，相信過後大家都會繼續抗爭」。
曾行船的何伯，深得旺角區佔領者敬重，10月中清場時大台的帆布正是他建起的，現時帆布在彌敦道遍地開花，近10個大型天幕均出自他和徒弟之手。他最不滿警察使用過份武力，自旺角黑夜後開始留守，認為一定要撐學生。

「我所做嘅係義不容辭」

何伯認為雨傘運動現階段已有成績，「全世界都睇到香港人高質素，香港人好容易滿足，要求普選天經地義，我哋唔需要擔心，我替共產黨擔心啫，𠵱家資訊咁發達，唔可以再冚住件事」。
今年66歲的何伯，年輕時居於浙江農村，經歷大饑荒、人民公社、大躍進，靠吃樹皮及樹根維生，13歲偷渡來港，「簡單嚟講就係人間地獄，大煉鋼，勞民傷財，盲目建設，人力白白消耗；大饑荒，糧食嚴重缺乏，政策失敗，民不聊生」。 被問到可能被捕，何伯這樣回答，「如果講被捕，如果你話違法嘅行徑，咁你拉咗警察同政府先，佢哋做咗好錯誤嘅事，我認為我𠵱家所做嘅，係義不容辭」。
至於秋後算賬，他說有很多賬跟共產黨算，「共產黨禍害我咁深，呢個賬算唔清」。他引用柏林圍牆一朝倒下的例子，指中共政權岌岌可危，「你以為佢幾強大，其實好脆弱，尤其𠵱家共產黨根本唔係嗰樣嘢，係黑社會，中共今日能夠仲企喺度，係因為中國人太腍善，其實1989年嗰陣就應該好似東歐蘇聯共產黨咁落台」。