人生講求運氣，好似選美出身嘅靚女「弱者救星」咁，以前喺二奶台已經出名肯搏肯露，做戲亦幾好，不過一直半紅不黑。後來佢加入影圈，做咗導演「猛太陽」嘅愛將，可惜發展都係麻麻，直到近年過檔入番公仔箱終於等到機會上位。

姐匙覺得弱者救星早年撈唔起，可能同佢份人唔識得避忌有關。點解咁講？因為好多年前出現咗一個好經典嘅遊戲角色，當時有傳媒搵弱者救星扮入面角色影相，咁啱當年有一部大熱手機好多人想擁有，咁橋當時負責為弱者救星影相嘅記者亦高價買咗，仲特登攞去影樓威畀其他人睇。

換完衫走人

不過影完相之後，呢位記者放低咗個電話喺影樓，同攝影師等成班人出去煲煙，成個影樓就得番弱者救星一個喺度換衫。當佢換好衫準備走，記者返到影樓至發現手機失蹤，發晒脾氣話要報警搜袋，喺呢個咁混亂嘅場面，弱者救星竟然冇理兼走人，當然部手機最後係搵唔番。姐匙唔係神探，查唔到手機失竊關邊個事，不過姐匙係弱者救星嘅話，喺呢啲敏感時間就一定唔會走，做人最緊要清白吖嘛，係咪？
撰文：Jessie
本欄逢周五刊登

【姐匙Talk】
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。