噚晚舉行嘅「第36屆青龍電影獎頒獎禮」終於圓滿結束，現年35歲嘅李貞賢打低一眾勁敵全智賢、金惠秀、全度妍等，憑電影《誠實國度的愛麗絲》爆冷封后，事實上李貞賢早於1996年就出道，1996年憑電影《花瓣》就已先後獲得大鐘獎及青龍獎嘅新人獎，演技實力不容置疑。之後佢轉向歌壇發展，更大受歡迎，鄭秀文首《煞科》嘅原唱者就係李貞賢，所以李貞賢被封為電子舞曲天后。

喺影藝圈多年嘅李貞賢非常熱愛自己嘅工作，佢封青龍影后之後，網民就搵返之前《誠實國度的愛麗絲》嘅導演安國鎮嘅訪問嚟睇，原來安國鎮曾經喺媒體座談會上大爆李貞賢今次拍戲係零片酬，佢話：「《誠實國度的愛麗絲》嘅預算為3億韓圜(約200萬港元)，李貞賢無條件出演咗電影。通常就算係無償出演，劇組都會支付交通費、油費等額外補貼嘅費用。但李貞賢真係連油費都冇收過，反而好貼心咁為工作人員們準備早餐。李貞賢出演呢部電影不僅冇收任何酬勞，反而還倒貼不少。」

而網民就刻意再將安國鎮導演嘅言論再討論，網民都一致大讚李貞賢為咗演繹好角色，完全唔介意做免費義工，大家都一致讚佢善良又大方。

另外，噚晚得青龍影帝嘅劉亞仁，就被發現當女團AOA擔任表演嘉賓，獻唱新歌《HeartAttack》時，佢竟然跟隨AOA嘅歌曲打拍子，腦袋不斷晃動，又跟住一齊唱，擺明平日有聽AOA嘅歌，當劉亞仁發現攝影機正拍攝緊自己時，佢即難掩尷尬，便急忙飲水遮醜，笑爆觀眾。網民亦留言：「AOA果然係大勢」、「劉亞仁亦都係AOA嘅粉絲吧」、「劉亞仁好可愛」等等。