既然唔係「失寵」,係咪繼續「得寵」呢?佢話唔可以咁講,「喺TVB冇出現過,TVB有個好制度,係集體領導,各司其職,所以寵呢個字唔適合喺呢度出現。」陳總咁講,恐怕好多藝員同事唔同意,無綫有冇得寵、失寵呢回事,大家心知肚明啦。話得說回來,好多以前失寵入雪櫃藝人,解凍後大紅大紫,因此失寵話唔定有後福呢!
眾所周知六嬸精打細算,原來仲會親力親為落地盤,怪唔得TVB可以獨大多年,陳總噚日話新地盤會興建廠房同表演場地,呢幅地曾用嚟拍攝《烈火雄心》,唔通六嬸睇中火燒旺地?無綫外事部副總監曾醒明稱,08年5月以約2,800萬元向將軍澳工業邨承租塊地50年,本來打算興建數據中心,最新計劃可能會興建新錄影廠,以製作大型節目,佢話目前電視城最大嘅一號廠最多可容納700多人,如果落實興建新錄影廠,規模應該比現時一號廠更大。