當年今日

隔牆有耳:陳志雲高呼冇失寵 - 李八方

蘋果日報 2010/03/04 00:00


幾個電視台近日股權、人事、世界盃轉播權起風雲,曲折離奇隨時精采過電視台自己嘅節目或者劇集,呢期傳得最勁嘅消息,就係TVB陳志雲可能唔撈。正所謂空穴來風,《蘋果》前日發現無綫話事人六嬸親自睇將軍澳地盤,隨行多個高層中,偏偏唔見陳總,電視城內傳出笑話,可能有人入咗雪櫃喎。
陳總噚日喺銅鑼灣錄影《志雲飯局》時,解釋前日佢要出席其他活動,所以冇陪六嬸出巡。陳總當日現身灣仔富豪薈酒店開幕儀式,不能分身到將軍澳,至於係佢唔到,定係冇預佢,八方就唔知嘞。對於被指「失寵」,佢睇得好開,「我有睇到報道,幾有趣,有創意。」
聲稱唔存在得寵失寵
既然唔係「失寵」,係咪繼續「得寵」呢?佢話唔可以咁講,「喺TVB冇出現過,TVB有個好制度,係集體領導,各司其職,所以寵呢個字唔適合喺呢度出現。」陳總咁講,恐怕好多藝員同事唔同意,無綫有冇得寵、失寵呢回事,大家心知肚明啦。話得說回來,好多以前失寵入雪櫃藝人,解凍後大紅大紫,因此失寵話唔定有後福呢!
眾所周知六嬸精打細算,原來仲會親力親為落地盤,怪唔得TVB可以獨大多年,陳總噚日話新地盤會興建廠房同表演場地,呢幅地曾用嚟拍攝《烈火雄心》,唔通六嬸睇中火燒旺地?無綫外事部副總監曾醒明稱,08年5月以約2,800萬元向將軍澳工業邨承租塊地50年,本來打算興建數據中心,最新計劃可能會興建新錄影廠,以製作大型節目,佢話目前電視城最大嘅一號廠最多可容納700多人,如果落實興建新錄影廠,規模應該比現時一號廠更大。
員工未聞建新錄影廠
TVB在08年底裁員200人,同時削減製作,八方向無綫中人打聽,好多人都話未聽聞興建新錄影廠消息,有人指現時錄影廠基本上夠用,興建新廠意味六嬸開水喉,對員工而言係好消息;有電視城中人大膽推測,莫非六嬸想興建超級錄影廠,定期做大騷,電視城變土炮版環球影城都幾好喎!

mailto:[email protected]