當年今日
關於我們

【有望復工】炳哥氣管收窄 女兒代報平安:心臟病人都有呢啲問題

蘋果日報 2017/03/09 21:16

送院手術心臟譚炳文氣喘

已經83歲嘅資深演員譚炳文噚晚漏夜入院,消息指佢氣喘不適,炳哥今日透過電話透露只係住咗一日,冇乜事。(新聞連結: http://bit.ly/2mEMVzd )
炳哥個女譚淑盈今日接受《蘋果》電話訪問時講到爸爸病情時,透露已經無大礙:「始終做過手術(心臟手術),唔係咩大事,係基本老化,好似車都要維修吓,用咗咁耐冇咁活躍。不過托賴,冇問題,只係要休息唔可以太勞累。」譚淑盈更預告炳哥可能會復工:「做嘢佢鍾意,喺屋企對住4幅牆,但配音組多人玩。」
譚淑盈又希望自己可以幫爸爸回應傳媒查詢,等老人家可以好好休息一吓:「希望你哋打電話畀我,唔好打畀佢,唔想佢咁用氣住,叫佢唔好講咁多嘢,等個肺可以休息吓,熄吓燈儲吓電,休息個零兩個禮拜。」譚淑盈亦會遵醫矚,叫炳哥好好休息:「醫生話唔好去人多地方,老人家感染好麻煩。唔係咁大件事,始終年紀大。」
譚淑盈更順道澄清爸爸病情:「佢唔係感冒,係氣管收窄,心臟病人都有呢啲氣管問題,之前做心臟搭橋,已經做咗15年,嗰時唔係微創,要劏開攞個心出嚟整,整完放番入去,成8、9個鐘,佢已經好叻。做過心臟手術會影響個肺,所謂心肝脾肺腎,心肺心肺吖嘛,冷親好易令氣管收窄喘氣。」譚淑盈仲話o依家炳哥食嘢要清,要戒肥膩同鹽。