很多人經歷過，佔領期間被朋友在社交網、甚至現實生活中unfriend。林子穎接受《蘋果》訪問時，當然有感受。「我覺得呢一兩年係好嘅。雨傘嗰陣大家會轉fb頭像，黃絲帶藍絲帶，大家好想表態。但係呢一兩年可能需要表態嘅事已經太多，亦都係一件令人心煩嘅事。嗰種無力感，就少咗將政治掛喺嘴邊。

「如果從社會撕裂嚟講，係好事嚟嘅，冇再話敵我分明，唔會再為一件事起罵戰。我覺得依家存在好多灰色地帶嘅人。我哋知藍絲黃絲，係因為佢哋拎出嚟講；中間嗰啲，冇乜特別嘅事發生，佢哋就唔會拎出嚟講，所以我哋唔知道佢哋嘅存在，但我相信每個人身邊都有嘅。

「香港人好鍾意錢，但唔會係『我鍾意錢係因為我相信資本主義。』佢哋只係鍾意錢之嘛。所以事情發生嘅時候，佢係base on嗰件事去決定贊成定係反對，而唔係base on佢嘅ideology，所以可以轉得快。如果你個人冇好強價值觀信仰嘅話，即係話你個人好易改變，咁溝通嘅位就多咗。」

「我點睇呢個時代？我覺得係灰暗嘅，好多嘢變得好快、或者係急劇惡化，而你又好似做唔到啲乜去改變，所以年輕人喺呢個時代之下成長，或者啱啱出嚟接觸社會已經係接觸黑暗嘅面向，其實係好令人灰心。

「我覺得香港係一個，對有理想、有啲執著嘅年輕人係比較苛刻。其實如果你行主流嗰條路，正正常常咁打份工、或者北上，都可以商機處處，過到啲幾好嘅日子。因為主流嗰條路太舒適，反而顯得你想做其他嘅嘢就好似好大阻力。

「可能你身邊嘅人都唔會理解，但係我覺得，喺呢個時代之下都肯行一啲與別不同嘅路嘅人，係好難得。」

曾經，很多人把梁天琦捧上成為英雄，不足半年又把他摔下來（由2016年旺角騷亂到同年7月就範簽「衰仔紙」為入閘）。現在大家又把他捧為英雄。

林子穎很不以為然：「我唔係好信偶像呢樣嘢。我會好admire一樣嘢，一個導演、一個作家，但每個人都有佢正面負面。如果你好100%去embrace一個人嘅時候，而你又見到可能係比較陰暗嘅一面，會唔會影響你成個信仰破滅呢？」

令林子穎感動的，是這句：「你哋香港人唔走，我哋藍衫嘅人唔會走，一定陪你留到最尾嘅。」就是發生在那個旺角黑夜。

採訪：何永寧
撰文：吳佩思
攝影：陳慧安