【新增動新聞】
有報章今日頭版刊登聲明，一位名為陳金華的新界打鼓嶺坪洋村陟雲祖堂原居民，稱與打鼓嶺鄉事委員會主席暨坪洋村村長陳崇輝斷絕父子關係。鄉議局當然執委兼律師林國昌表示，登報斷絕父子關係的做法只是表達個人意願，惟在法律上父子關係沒有改變，「（佢）只係昭告天下，斷絕關係咁樣，但冇得斷絕㗎，佢老豆嚟㗎嘛」。

陳金華在聲明中指出，按其宗族歷代規矩，他本人日後之生養死葬，陳崇輝俱無權參與，「根據祖例，其踏足陟雲祖堂祭祠之權利，亦將受到限制。盼各叔伯兄弟及一眾鄉親明鑑」。

不過，林國昌強調，即使陳金華與陳崇輝斷絕父子關係，但陳崇輝本身是原居民是不變的事實，「佢做村長個位，係條村原居民選出嚟，唔會因為佢爸爸表達咗咁嘅意願就冇村長做，唔會咁嘅」，又指「（陳金華）佢話同佢斷絕關係，唔通又唔係佢老豆喇咩，血緣法律上嘅關係喺度」。

林稱，陳金華死後的遺產，陳崇輝同樣有繼承權，「當然如果陳金華自己做咗平安紙、遺囑就隨佢意願處理」。換句話，陳金華與陳崇輝斷絕父子關係，並無影響陳崇輝擔任打鼓嶺鄉事委員會主席和坪洋村村長，而原居民的權利仍可享有，並可繼續進入祠堂。