長駐內地嘅騰訊創辦人馬化騰，今日專程飛到香港，唔係嚟做自由行濕平，而係出席馬會首次舉辦嘅「慈善共創 都市聚焦」國際慈善論壇；「小馬哥」嘅分享，更成為全場焦點。

「小馬哥」話喎，原來約喺06年成立慈善基金後，將騰訊百分之一嘅利潤撥出嚟做慈善。身兼主持人嘅馬會慈善及社區事務執行總監張亮就有啲好奇嘞，騰訊嘅利潤即係幾多呢？難得有機會梗係直接問，「小馬哥」突然有少少怕醜咁回應：：「三百多億元。」嘩，台下嘉賓計一計，即係撥捐慈善基金嘅，最少有三億人民幣㗎！

咁營運慈善基金有乜困難？「小馬哥」舉例話包括人工，佢話薪水唔可以太低，否則請唔起好似張亮呢種高級人才，嚇到張亮急急回應：「其實我很便宜！」全場當然爆笑。