林夏薇日前揸車返屋企途中，被從小路出大路嘅車攔腰撞，當時覺得頭痛同頸痛，報警後去醫院檢查，之後發現左手冇力兼麻痹，今日
林夏薇喺IG貼出X光片相，留言：「正常頸椎（左）和我的頸椎（右）。」晒出兩張圖有明顯對比，指自己病假開始。

《蘋果》向骨科醫生翟慶聰查詢，翟醫生表示：「正常應該彎，有啲弧度，好似C字形咁，頸椎直晒，多數係因為肌肉緊張，就會緊晒同收縮，會做成一個情況，好似佢條頸咁，反而會直咗，會拉直咗，幫佢檢查時撳落去會感覺到可能是旦有一邊啲肌肉特別緊，通常被攔腰撞，就會chok到，當然每個人情況唔同。」

問到林夏薇之後發現左手麻痹，翟醫生解釋：「一般嚟講，有機會係間歇性嘅問題，當然亦都可能有長時間問題，chok一chok拉到啲神經，永久傷殘嘅機會係好細。」

翟醫生又指一般係開止痛藥同消炎藥，以及做物理治療放鬆啲神經，鼓勵盡量郁動，越唔郁動，對佢嘅情況係冇好處，佢話：「一般人怕再整到就會唔郁，都要兩、三個禮拜先好番，冇咁快會康復。」

精選娛聞，喺晒《娛果》
http://fb.com/appledailyent