李斯特城前鋒占美華迪由工人變身英超冠軍成員嘅故事蔚為佳話，但佢成名後並冇忘本，唔單止開設「V9學院」栽陪具潛質嘅業餘球員，月初仲舉行為期5日試腳，邀請42位非聯賽球員喺各地球探面前一展球技，結果終於有收成！26歲前鋒丹尼紐頓（Danny Newton）過去一季為非聯賽球隊譚禾夫射入34球，最終喺日前免費加盟英乙球隊史堤芬納治，呢位因擅長纏繞敵軍後衛而獲得「胡蜂」（The Wasp）綽號嘅射手亦決定毅然辭去工廠一職，追逐職業足球夢！

得知學生獲得職業聘約，華dee亦「老懷安慰」：「當我知道Danny收到史堤芬納治嘅合約，真係好興奮，佢來自我哋最早一批學生，亦似乎同我擁有相似旅程。」除咗紐頓，仲有另外5位「V9學院」成員正接受職業球會試訓，話唔定幾年後回望，英超會多咗幾位「新華dee」！