星爺捧紅嘅「美人魚」林允，早前被爆佢同馮紹峰拍拖行公園、陪行街，雖然外界有傳二人戀情只係炒作，不過日前傳佢哋已甜蜜同居，更指馮紹峰爸爸早已認識林允，似乎見過家長，感情一日千里。

盛傳馮紹峰同林允上年5月撻著，更傳二人約會撐枱腳，當時馮紹峰同舊愛倪妮喺同月17號，喺微博宣佈和平分手，未知分手原因係唔係同林允介入戀情有關，林允同馮紹峰近日不時被影到出雙入對，不過林允日前出席公開活動，被問感情狀況，佢竟然聲稱單身，否認同馮紹峰嘅戀情，之但係講就咁講，當晚佢就被人影到馮紹峰租咗遊艇，同女友林允慶祝生日!

據內地報道，當日馮紹峰飛抵上海之後，就去咗林允下榻嘅酒店，跟手馮紹峰嘅座駕由酒店地庫，開出駛至黃浦江邊碼頭餐廳停低，一班友人陪同之下，唙碼頭上咗一部遊艇，林允則一直企喺馮紹峰身邊，仲用外套遮住個頭，走上遊艇之後，林允先除下外套，馮紹峰就一手捧住個蛋糕，為女友林允慶祝。