尋晚（6日）谷中夜賽，潘頓襯死敵莫雷拉停賽嘅首日，即時連下兩城，追近比數至115:116，兩者只欠1W，然而雷神今期日賽繼續停賽，潘頓當然唔會放過呢個咁難得嘅機會。

睇返潘頓今期嘅排位表，11場賽事中只係得第三場有得唞，其餘場次所騎的大部份都好有實力贏馬，尤其同羅富全合作更值得留意，事關佢哋沙田合作22次，有18次上名，所以點可以走漏第4場「火箭駒」及第11場「翔惑」呢？

尤其「火箭駒」早前由大摩轉倉過嚟，當中與馬主洪祖杭掀起羅生門嘅故事，至今仍是茶餘飯後話題。

今次於羅廐初出，或者練者藉今仗，向馬主證明自己練馬實力不亞於大摩，再用合作無間兼戰意旺盛嘅潘頓，贏馬真係唔出奇。