王灝兒(JW)今日在尖沙嘴出席兒童音樂慈善馬拉松擔任嘉賓，JW眼見小朋友演出憶起兒時自己嘅表演慾，無論跳舞、唱歌、運動均會參與，真係稱得上唔怕醜，佢解釋：「鍾意玩，上到台都會怕醜，但細個累積令我有今時今日膽量。」

JW直認係校內嘅活躍分子，亦即係風頭躉，仲話：「我讀女校，但亦會參加其他男校嘅活動，中學認識到O依家嘅同學都keep住聯絡，細個識朋友容易啲，講講下就攬埋一齊做朋友。」JW話因為自己太健談，老師就將她編埋同一位全班最文靜同學一齊坐，後來兩人成為好朋友。

6月18日係JW 28歲生日，今年會喺香港過，佢仲同父母講：「你個女仲有兩年就30歲。」父母應該會催婚，JW話：「冇喎，佢哋只係focus我事業，只會問我幾時出新歌。對於呢方面隨緣，唔心急，暫時大家都為事業拼搏。」並享受辛苦命，婚後也會繼續工作。

精選娛聞，喺晒《娛果》
http://fb.com/appledailyent