今晚電影《第七謊言》喺尖沙咀首映，不過男主角鄭中基就冇到，其他出席有何超儀，姜皓文(黑仔)，羅仲謙同林德信及趙碩之等等。

講到港視下月19號開台，仲搞公投開台劇，有份演出嘅黑仔話:「梗係投《警界線》啦，開台好替佢哋開心，因為大家等咗好耐，等到死咗條心咁滯，點知突然有返機會，雖然係手機網上先睇到，但係起碼睇到，因為怕好多劇會過時。」開台如果有慶祝活動會否出席，佢話:「嗰日要開電影，好想去，睇下食飯有冇時間偷啲時間過去。」

趙碩之就冇份演出，佢話嚟撐下鄭中基，點知嚟到先知對方缺席，佢話:「因為最近同鄭中基合作電影，支持下佢，o依家新公司啲時間好好，多咗時間陪屋企同做生意。」問佢做咩生意，佢話同屋企人一齊做，但就唔知屋企人想唔想講，所以冇透露詳情。問到係咪以前公司工作時間唔好所以好唔滿意?佢話:「唔好拎返嚟講，總之o依家好滿意。」

最近佢成日俾人影到同男友拍拖，趙碩之就話:「人大咗，大方咗，拍拖都會拖下手。」幾時拉埋天窗?佢話:「同佢好夾，但都要時間去了解，睇下係咪結婚對象，始終拍咗只有幾個月，半年都未夠。」問到男友點稱呼，佢話叫「Landon」，又話報道有出過，係一名職業足球員，仲話男友今日問:「做乜唔黎睇我打波?」

主角之一嘅羅仲謙就表示戲中演「打雜」:「除左做司機，又係兼職男朋友。」問佢咩係「兼職男朋友」，佢話就係「對方老公唔喺度就陪人妻」嘅角色，又表示戲中有親熱戲，咁會否同女友備案?佢話:「從來都唔使，演員係咁O架啦。」