【足足30年】無綫劇《季節》演員Re-U 「媽打」鄧碧雲珍貴合照曝光
羅嘉良大dee姚正菁季節
「人事每天多變更 誰亦盼望有一些預感 無奈風雨偏要驟來 叫你失信心……」歌詞當然有聲,仲有畫面添。呢個畫面,就係當年《歡樂今宵》時段播嘅處境劇《季節》喇!
根據維基資料,《季節》係1987年3月起至1989年於《歡樂今宵》內首播,90後嘅你,應該只會對「媽打」鄧碧雲有好模糊嘅印象。
《季節》嘅靈魂人物,當然係「媽打」,老公唐泰(朱瑞棠飾,但佢喺劇中暱稱又唔係叫「花打」)喺劇中係開涼茶舖泰和堂,仲揸住啲物業咁啦。有錢就自然多麻煩嘢,特別係大家族。媽打同唐泰有四仔女:
大仔唐貴全(郭峰飾,私生子嚟嘅)
二仔唐家偉(顏國樑飾,暱稱大Dee)
三仔唐家禮(羅嘉良飾,暱稱細Dee)
四仔唐家俊(梁朝偉飾,佢女朋友係陳雅倫)
五妹唐嘉文(姚正菁飾,暱稱囡囡)
樹枝表繼續發展,例如盧海鵬係朱瑞棠二弟,盧宛茵係三妹;林建明係顏國樑老婆,郭鋒同陳秀珠有一段苦戀,最後同商天娥一齊……。至於李家聲就係盧海鵬個仔,李家鼎就係林建明個親生大佬。總之就係關係複雜。
重要一提,羅蘭姐都有份演,佢飾演媽打陪嫁丫鬟芳姐;至於譚炳文就飾演媽打個貪得無厭嘅細佬。
不經不覺,媽打已經離開咗我哋27年,《季節》一班演員,亦各散東西,但不少仍活躍娛圈,噚晚羅蘭姐、郭鋒、盧宛茵、盧海鵬、林建明、李家聲、無綫監製何小慧同現職NOW寬頻電視嘅金廣城一齊食飯,仲有就係郭富城舊愛、已嫁人仲生咗兩個女,改埋名「姚舜薰」嘅姚正菁。
林建明於社交網貼出《季節》Re-U合照,同一張攝於1988年嘅珍貴齊人大合照,寫道:「1988年的《季節》在2018年來一個小聚!很想念媽打!」
林建明接受《蘋果》電話訪問時稱:「飯局係金廣城做搞手嘅,盧宛茵幫手約人,噚晚大家都好開心呀!講番拍劇趣事呀近況呀。我哋都有搵羅嘉良,但佢唔喺香港。」佢話都有計劃將來再搞《季節》大型聚會,邀請台前幕後出席。林建明又話:「有啲嘢自己真係已經唔不記得,好似原來何小慧係導演,傾番先記得,影大合照嗰陣佢有咗五個月,真係唔講就冇印象。」
講到呢度,林建明亦好感觸:「唔知大家有冇變喇…伊雷同媽打都已經唔喺度,好掛住佢哋。」
認到佢哋嗎?
後排左起:何小慧、盧宛茵、林建明、郭鋒、李家聲、金廣城
前排左起:盧海鵬、羅蘭、姚正菁
難得昔日《季節》台前幕後,聚首一堂。(林建明fb)
梁朝偉出名眼神殺死人,當年佢演媽打四子,媽打呢個眼神,又殺唔死偉仔呢!
當年林建明要掌摑老公顏國樑,但力度過猛搞到顏國樑受傷入院。