警方本周三暴力驅趕金鐘反送中集會民眾，出動布袋彈、胡椒彈及橡膠子彈等對付示威者，事後更派便衣警在公立醫院監視及拘捕受傷示威者，製造空前的白色恐怖。有當天胸口中彈青年向《蘋果》憶述，他持雨傘站在示威前線叫口號，從無襲警，卻遭警方以橡膠子彈或布袋彈擊中右胸致受傷流血。由於擔心被捕，他不敢去公立醫院，只請護士朋友協助療傷，但除衫時發現傷口「成塊皮扯咗出嚟」，右胸一大片瘀傷，不斷滲血，要花數小時處理傷口。他形容「中槍嗰刻最痛係心痛」，質疑警方在醫院拉人做法好陰險，「啲傷者受咗傷，負傷去到醫院，然後下手拘捕，我覺得警方好冇道德，好冇道義。」他這幾天雖已累積極重的無力感，但他表明周日會再次上街遊行，希望負傷下仍能再出一分力「反送中」。

記者：李啟發 周子惇

23歲示威青年阿源，受傷翌日現身受訪，他表明擔心風險而拒絕求醫，並選擇在一個公園暗角受訪。他憶述，前日早上趕到金鐘，已有大批民眾聚集，於是在中信大廈停留，站於中排位置支援。「遞吓嘢（支援），睇吓會發生咩情況。」至下午約3時，有示威者稱行動將升級，氣氛緊張，他便走近立法會門口較前線的示威位置。

當時警方一直後退，示威民眾一直推進，警方一度以警棍亂打手持雨傘的示威者。後來警方退至立法會門口防線，開始有情緒高昂的示威者掟水樽。阿源說：「我反對嘅，唔應該掟水樽或者襲擊警察。」

惟有人掟水樽後，警方立即出動胡椒噴霧和催淚彈，甚至「開槍」，阿源走避不及，感到右胸劇痛。「其實嗰刻我唔知佢開槍，淨係知有嘢打落心口，覺得肌肉好痛、好辛苦，有段時間呼吸困難。之後我先慢慢意識到可能已經中咗彈，但知冇打入心、冇穿，相信唔係（金屬）實彈。」

阿源估計被橡膠子彈或布袋彈擊中，強調當時只持雨傘抵擋，「意識到中槍嗰一刻其實好難受，估唔到警察會開槍射擊我，最痛係心痛，我為咗香港嘅未來去做呢樣嘢……嗰刻有少少覺得香港玩完，同埋如果嗰槍係真槍，我就已經玩完。」

由於情況危急，示威者開始撤退，他亦忍痛撤走，但越走傷口就越痛。他趕回家檢查傷勢，「以爲冇乜嘢，上網睇到中咗布袋彈啲人，可能有個印，但我除衫嗰時，先發現成塊皮扯咗出嚟，見到肉，係成個圓圈嘅肉出咗嚟。」

他雖然用消毒藥水處理傷口及殺菌，但久久不能止血，「去到今日（中彈翌日），我應該洗咗18次傷口。」數名已撤走或準備參與示威的朋友，都前來助他處理傷口。洗傷口時「啲血水不斷滲出嚟，搞咗3、4個鐘。其實今朝都一路滲血，今朝都要再換過藥。」

一向很少求醫的阿源擔心傷口情況，「驚傷到肺或者內臟，有可能會死嘛！」但他擔心到醫院求診有機會被捕，故決定自行處理傷勢，一名醫院護士朋友亦上門幫他檢查，相信沒大礙，阿源才安心。

怎料昨日下午，阿源由新聞得知，警方真的派員到公立醫院拉人，「好彩我冇去醫院，警察真係好狗，連傷者都要拉，係好陰險。你要拉要鎖咪即場囉，你要啲傷者受緊傷，負傷去到醫院，你先喺嗰個情況下手，好冇道德，好冇道義。」

現時阿源郁動右手或用力起身，仍感痛楚，問他會否往醫院求診，他堅決拒絕，「都唔擔心得咁多，我擔心香港多啲囉，（擔心）香港嘅未來，香港嘅前途。」但另一方面，他覺得即使如何表達意見也是徒然，因特首林鄭月娥完全不聽民意，「佢老公話佢賣咗個身畀香港，我好肯定答唔係囉，佢係賣咗（身）畀共產黨。」

5年前雨傘運動，阿源在金鐘街頭過夜，亦中過催淚彈。他認為雨傘運動失敗，「無機會再發動咁有規模嘅遊行示威，或者類似革命」，更曾想移民逃離香港。直至6月9日逾百萬人上街，令他重燃希望，可惜林鄭政府完全不聽民意，警方的暴力行為，亦越來越肆無忌憚。

「香港人有好多包袱，家庭、事業等等，好多人唔捨得犧牲，覺得賺錢最緊要，其實唔可以咁短視，將來香港衰咗，你都唔會有機會賺到咩錢。」被子彈擊中，也沒令他卻步，「如果可以救到香港，我呢啲少少皮外傷在所不惜，中多幾槍都仲得，如果香港有救嘅話。」

阿源表明這幾天已累積極重的無力感，「好無助同埋好嬲，唔知香港可以點算，再唔知香港市民可以點做，先可以令呢個政府聽得入人民嘅意見，聽到人民嘅聲音，我亦都好驚政府秋後算賬，或者中央會拉我呢啲搞事嘅人，去做啲乜嘢。」

民陣周日再次發起遊行，阿源稱曾考慮是否再上街，因他對政權已幾乎感到絕望。但當要他即時決定是否上街，他思考了一會兒，便稱：「我會再出去，令政府撤回呢條條例，如果唔係香港真係玩完。今次100萬人令條例暫停開會，如果200萬呢？300萬人呢？400萬人呢？我覺得香港仲有希望，一定要畀香港政府同中央知道香港人團結，先可以打贏呢個咁獨裁嘅政府。」

【新聞有價】繼續撐蘋果
請往蘋果日報網站了解更多

你敢爆，我敢獎！ 立即WhatsApp《蘋果》24小時爆相爆片熱線 或致電：63836568