一連20場劉德華跨年騷進行得如火如荼，今晚華仔已經唱到第10場，順利完成了一半演出，除咗晚晚座無虛席，老婆朱麗倩同囡囡劉向蕙睇足咁多晚之外，仲有白雪仙、陳寶珠、劉嘉玲、陳慧琳、葉德嫻、鄭少秋、汪明荃、梁詠琪等眾星輪住捧場，日前更發生男觀眾跳上台攬華仔事件，究竟呢個演唱會有乜咁吸引呢？

《蘋果》幫各位觀眾解構吓華仔騷嘅秘密，整個舞台由超過60個升降台同兩條Catwalk組成，全部由電腦控制，舞台可以調整唔同高度，配合全4K視頻內容同燈光效果，舞台設計由英國著名建築公司Stufish Entertainment Architects負責，呢間公司專門為國際巨星製作舞台，包括：Beyonce & Jay Z、Rolling Stones、U2、One Direction等。

今次華仔騷其中一個最特別之處，就係首次拆除紅館大電視，令全場觀眾可以冇死角睇華仔演出。而超巨型天幕圓周達54米，覆蓋咗超過一半嘅紅館天花，可以好好欣賞華仔囡囡向蕙嘅畫作。至於華仔扮飛人危站半空唱歌，畫面夠晒震撼，呢個飛人吊掛特效，製作團隊專程由日本請特效吊掛公司負責飛人嘅效果，吊掛離地高度約15米，路軌總長超過100米。

而今次華仔騷視像效果豐富，由紐西蘭視像效果總監帶領國際團隊，設計全4k視像效果，總共運用20部激光投影機、LED屏及天幕投影，由4部D3控制，為觀眾帶嚟全新視覺享受。

至於華仔大頭公仔呢part夠晒得意，呢個造型係由美國設計公司，仿照華仔造型度身訂做；而舞台道具同My Love雕像都出自名師之手，由著名當代雕塑家黃玉龍精心設計同鑄造。

精選娛聞，喺晒《娛果》
http://fb.com/appledailyent