【棟析先機】從化試閘紋風未動 「心多多」博得過（陳華棟）
蘋果日報 2020/03/13 21:30
陳華棟棟析先機
心多多換黃俊值得重視
周末（14日）第二場「北極光」上場初出已經係兩倍半大熱門，準備工夫足而馬又有型有款，對手唔算叻，成為熱門好合理，但始終未有作賽經驗，輸畀進度好啲嘅「年年豐收」亦無法子。
事實嗰場響十檔起步後，想搶又搶唔到，被逼稍留仲要走外叠，蝕位多而追得勁，其實已經係高難度動作！高質素馬匹跑過一場進步好多，馬匹乖巧馴良易騎，前景好嘅質新馬，排檔又理想得多，預期可以順利補中！
第六場「心多多」明明季初已經響三班千四米贏馬，仲要贏夠兩個馬位，估都估佢會扶搖直上！
點知跑落得個近字，但你話好差又唔係，近兩仗仲有山雨欲來嘅感覺，今次賽前響從化備戰，試閘紋風未動走勢好，用上迅速適應賽事速度感嘅黃俊，點都要畀多次機會佢，有分頭仲正啦！
第九場「行星夢」上仗初跑三班，排中檔但內側大埋前領馬一齊放，結果搶唔掂唯有留住衝，跑唔到最佳跑法但仲可以追入第四，難度高！
換上利敬國一樣係騎得之人，繼續孭輕磅作賽形勢好，當起早熟馬，今場有力補中！