演出韓國育兒節目《超人回來了》而大受歡迎嘅「國民三胞胎」大韓、民國、萬歲，雖然早前陪媽咪去咗法國定居，不過近日就因《第22屆釜山國際電影節》而返韓，演員老竇宋一國亦相當識做，知道粉絲掛住三位小朋友，呢幾日都Keep住喺Instagram公開三胞胎的短片。

宋一國利用應用程式，將三胞胎變為三隻可愛倉鼠，而三胞胎一張開口，就會變成倉鼠食嘢嘅模樣，三胞胎亦有樣學樣，張手放喺前面好似拎住嘢食咁，相當得意，當中萬歲更興奮得滯爬到枱上，對住鏡頭擘大口，畀老竇笑佢似肉食動物，真係搞鬼。