耶穌誕辰變成消費節日，倒數、去尖東睇燈飾成為市民心中與聖誕無謂又無關的環節，不過要數到最無謂，還是收到用不着的聖誕禮物。

不知大家可曾試過在平安夜踏入聖誕前夕的十秒鐘，無厘頭有人倒數迎聖誕，Cherry說以前真的有人會倒數，「你倒數人哋出世，其實都係幾奇怪。以前有啲地方真係有人倒數㗎，『yeah，Jesus，生日快樂，出世啦！』哈哈」黃同學沒有遇過但亦覺得騎呢，「聖誕節倒數好似……冇新年咁好。」

學生Cherie與Sandy就揀海傍燈飾最無謂：「宜家真係去商場睇粒燈飾，唔會過海傍睇，因為海傍年年都係嗰啲，唔update；商場有唔同主題，又會有新裝飾。」

至於交換聖誕禮物，歷年不受歡迎之最的杯繼續榜上有名，中六劉同學說年年學校都會搞聖誕派對，他覺得收杯最無用，「屋企有好多啦！」不過他指別人一份心意，還是應禮貌接受。陳小姐就覺得暖水壺無用，「都唔會拎出街用㗎啦！」

黃同學自爆自己送過最無用的禮物是領呔，「送畀同學，佢到而家都冇用」，其朋友另一位黃同學爆響口因為對象是女生，所以一直沒有使用。

Cherry指自己收過吹氣Mary，「淘寶訂嗰啲，明明個頭吹脹咗個頭都係咁跌落嚟，我落到樓下見到垃圾桶即刻dump咗佢。」

其實無論節目抑或禮物是否無謂，反正一連幾天公眾假期，對於長工時的打工仔而言已是天賜的厚禮，正如莊先生所言：「聖誕節點會無謂㗎，節日嚟㗎嘛，總之過節有節目就係一件好事。」

記者 袁楚雙