新世界發展（017）第三代接班人鄭志剛（圖）似乎打緊「告急牌」喎。講緊嘅，係佢揸旗嘅新百貨（825）私有化大計，有機會因唔夠票而觸礁，公司罕有地連日又出通告又登報紙廣告，講明截止接受私有化日期係下周一，既不加價，亦不延期，表面係最後通牒，實質似係告急。
新世界今年6月初提出私有化新百貨，基本上要收齊九成街貨先做到，公司三度延期，新世界亦有出手買近一成街貨，可惜，直至上星期，新世界只收到約85%街貨，未夠九成，尚欠2,500萬股至夠數。
呢個數話細唔細，如果有心人死揸，焗唔到公司加價私有化，寧願一拍兩散，我走唔到貨時，你亦私有化唔到，咁呢單私有化就要拉倒，新百貨至少要等一年後先可以重提私有化。當年佢哋私有化新中都搞咗兩年，加埋價先掂。