除咗古天樂成功殺入商台「叱咤樂壇我最喜愛的男歌手」最後5強，明年1月1日會同陳奕迅、張敬軒、周國賢，同埋上年攞獎嘅陳柏宇一較高下，女歌手嘅5強亦都公佈咗，不過跑到最後邊個可以攞獎，到目前為止仍然好難估計。

商台今朝11點公佈「叱咤樂壇我最喜愛的女歌手」嘅8強走勢，入圍名單有AGA、Gin Lee、何韻詩、容祖兒、楊千嬅、衛蘭、盧凱彤同謝安琪，但只係隔咗短短一個鐘，12點嘅五強名單，就有三位歌手要出局，除咗AGA之外，楊千嬅同何韻詩都冇得留底，而今年8月離世的盧凱彤則繼續得到樂迷支持，成為最後5強。

去年組合ToNick因為一首歌爆紅勇奪「叱咤樂壇我最喜愛的組合」，今年5強就被out，入圍組合有Dear Jane、Robynn & Kendy、RubberBand、Supper Moment，同埋喺ViuTV《全民造星》走出嚟嘅MIRROR，MIRROR喺今個月頭先有終極成員名單，暫時得一首歌《一秒間》，咁快就入到圍，人氣真係好高喇。

精選娛聞，喺晒《娛果》
http://fb.com/appledailyent