李八方online︱有線sales向請辭總編強調編採方針不變
蘋果日報 2020/12/23 21:37
有線新聞劉紫鳳有線中國組
今個月初嘅有線大裁員，餘波未了。被炒嘅前有線主播劉紫鳳喺fb爆料，講述有線銷售員竟然向返被炒嘅劉紫鳳推銷有線新聞台。聽落去好好笑，諗深一層其實不勝欷歔。
劉紫鳳話就喺大裁員翌日，佢同埋其他被炒嘅有線人，陸續收到有線電視銷售員嘅來電，話想提供返個同員工優惠差不多嘅價錢畀佢哋訂閱有線，個銷售員仲推介話，除咗有線新聞外，有線仲有電影台、體育台等。劉紫鳳反問：「唔睇新聞，有線仲有咩值得睇？」
據劉紫鳳講，一位主動辭職嘅有線總編遇到嘅情況仲好笑，個銷售員向呢位總編話有線新聞編採方針不變！正如劉紫鳳所言，「公司的sales， 向新聞部總編輯，講解有線新聞的『編採方針』，世事就是如此荒謬」。點止荒謬，直頭係黑色幽默添啦。
KOL應徵主播 舊中國組「做埋今年就完」
另一方面，有線高層喺裁員嘅同時，又為主播增聘人手。劉紫鳳之前已經透露，有高層拎咗份履歷畀主播組組長睇，駭然發現份履歷寫住應徵者係KOL，興趣係唱歌。What！？咁都可以應徵，係咪到時報報吓新聞唱返首歌先？不如索性搞返個《全民造主播》比賽先啦。唔知係咪好彩，劉紫鳳話最後呢位KOL都冇做到。
有線嘅未來係點，大家心中有數，劉紫鳳就提提大家，據講舊嘅有線中國組做埋今年就完，明年元旦開始就會有大變動。
有線中國組除夕夜「熄燈」
有消息人士都話，有線中國組大部份員工將於12月31日Last Day，換言之中國組同日會「熄燈」，當晚9時半新聞出街後，全部人將會離開公司。
據消息人士了解，有線「四人幫」想喺翌日元旦日（1月1日）繼續有中國組節目出街，但就由唔同人去做，暫可能由編輯炒稿頂檔，類似無綫新聞嘅《中華掠影》，但消息人士就話目前為止都未知有無其他人接中國組班，完全無人交接，所以兩個駐站都唔知點算。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！