由韓國神劇《太陽的後裔》金牌編劇金恩淑執筆、李秉憲及金泰璃主演嘅tvN劇集《陽光先生》(Mr. Sunshine)於7月首播，劇集收視屢創新高，合共24集嘅《陽光先生》仲有兩集就大結局，原本本周就大結局嘅《陽光先生》，因為本周六日播出中秋節目關係，所以就順延至29日及30日先播出大結局，港劇迷可於周六、日晚10時30分透過Netflix追劇。

而男女主角李秉憲及金泰璃就趁結局前先後接受本報電郵訪問，對於事隔9年再拍電視劇，李秉憲就說：「我找不到任何唔同金恩淑編劇同埋李應福導演合作嘅理由，加上我一直都好希望再拍攝電視劇，當我讀完劇本個一刻，我就決定要參與呢部劇。我覺得《陽光先生》嘅故事很引人入勝，寫得好好，而且我個角色有趣，讓人好想探究更多。」

與金泰璃年紀相差成19年，李秉憲大讚對方：「金泰璃能感受到和演繹出好廣闊、好複雜嘅情緒，令我幾乎忘了佢唔係投入演藝事業好多年。我喺金泰璃身上，睇到愛信(金泰璃劇中角色)嘅堅強與柔韌。」同時李秉憲直言喺劇中佢算係最資深啦嘅演員之一，亦令到佢感到重大嘅責任感。

至於金泰璃直言劇中有唔少動作場面佢都親自上陣，佢亦會同專家確定係唔係安全，一有時間就會練習騎馬。劇中佢不時要用步槍，金泰璃話：「步槍嘅重量比我想像中仲要重，每次拎起槍並唔係只係拍射擊戲，仲要瞄準，等對戲嘅人講完台詞，支槍要拎住好耐，肩膀以下嘅肌肉會開始顫抖，第二天仲會痠痛。」

金泰璃自爆即使現實生活中，佢仍然會愛上崔宥鎮(李秉憲劇中角色)，又話：「因為佢就係愛信會情不自禁愛上嘅人。」金泰璃表示一開始接愛信呢個角色時非常猶豫，仲同導演和編劇坦言怕自己無法承擔呢個角色，但二人都向佢保證會盡其所能彌補任何不足，而金泰璃亦覺得愛信個角色同佢過去演嘅角色好相似，所以最終亦令佢決定接演。

金泰璃自言金恩淑咁多作品中，佢最喜歡就係《鬼怪》，又話：「選角都恰如其分。」

更多韓流，喺晒《娛果》
http://fb.com/appledailyent